Mu ruzinduko yakoreye mu Ihuriro, Komisiyo ya Sena ya Politiki n’Imiyoborere myiza yagiranye ikiganiro n’Ihuriro mu rwego rwo gusobanukirwa no kugenzura imiterere y’amasomo urubyiruko ruhabwa mu ishuri rihugura urubyiruko mu bya politiki n’imiyoborere/YPLA n’uruhare rw’urubyiruko rwahuguwe muri iryo shuri mu gufasha Imitwe ya Politiki gukomeza kunoza imikorere yayo.

Ibi biganiro bikaba byabaye kuri uyu wa kabiri tariki ya 28 Nyakanga 2020, ku biro by’Ihuriro ku Kacyiru mu Karere ka Gasabo

Iri tsinda ryari rigizwe na Hon. DUSHIMIMANA Lambert, Perezida w’iyi Komisiyo; Hon. MURANGWA Hadija, Visi Perezida w’iyi Komisiyo; Hon. NTIDENDEREZA William; Hon. UWERA Pelagie; Hon. Prof. KARANGWA Chrysologue na                   Hon. NSENGIYUMVA Fulgence.

Nyuma yo guhabwa ikaze n’Umuvugizi w’Ihuriro, Hon. DUSHIMIMANA Lambert, Perezida wa Komisiyo yabwiye abari muri ibi biganiro ko bamaze iminsi bagenzura uko Imitwe ya Politiki ifasha urubyiruko ruhugurirwa mu Ishyuri ry’Ihuriro ryigisha urubyiruko ibya politiki n’imiyoborere/YPLA gukoresha neza ubumenyi ruvana muri iryo shuri; kumenya imiterere y’amasomo uru rubyiruko ruhabwa muri iri shuri n’uruhare rw’urubyiruko rwahuguwe muri iryo shuri mu gufasha Imitwe ya Politiki gukomeza kunoza imikorere yayo.Umuvugizi w’Ihuriro Hon. MUNYANGEYO Theogene wakiriye aba Basenateri, yabashimiye uruhare bagira mu kugenzura iyubahirizwa ry’ishyirwa mu bikorwa ry’Amahame Remezo, n’izindi nshingano zayo muri rusange;  ababwira ko Ihuriro naryo nk’Urwego rushyirwaho n’Itegeko Nshinga, ryubahiriza ayo Mahame Remezo kandi rifasha, binyuze mu nshingano zaryo, Imitwe ya Politiki kuyubahiriza rikaba kandi nk’imwe mu nshingano zaryo, rifasha Imitwe ya Politiki mu kubaka ubushobozi bwayo, haba mu mahugurwa ategurwa n’Imitwe ya Politiki ubwayo, haba kandi no mu mahugurwa ategurwa n’Ihuriro.

Mu mahugurwa ategurwa n’Ihuriro, hakaba harimo n’ishuri ry’Ihuriro ryigisha urubyiruko ibya politiki n’imiyoborere/YPLA. Aha Umuvugizi w’Ihuriro asaba Umunyamabanga Nshingwabikorwa w’Ihuriro gusobanurira Abasenateri uko iryo shuri ryagiyeho, amasomo atangwa, abaryitabira n’uko abarangije amasomo bakurikiranwa.

Umunyamabanga Nshingwabikorwa w’Ihuriro Bwana BURASANZWE Oswald yagaragaje ko Ihuriro ry’Igihugu Nyunguranabitekerezo ry’Imitwe ya Politiki ari urubuga Imitwe ya Politiki ihuriramo ikaganira kuri politiki rusange y’Igihugu, ku bibazo biremereye Igihugu, rikajya inama ku nshingano n’uruhare rwaryo mu kubaka ubwunvikane n’ubumwe bw’Igihugu.

Yababwiye kandi ko Ihuriro ry’Igihugu Nyunguranabitekerezo ry’Imitwe ya Politiki rihuza Imitwe ya Politiki yemewe mu Rwanda yabisabye ku bushake kandi yemeye kubahiriza ibiteganywa n’Amategeko Ngengamikorere yaryo; kugeza ubu Ihuriro rikaba rigizwe n’Imitwe ya Politiki  cumi n’umwe (11) yemewe mu Rwanda  kandi yemeye kubahiriza ibiteganywa n’Amategeko Ngengamikorere yaryo. Ihuriro kandi akaba ari urwego rwigenga mu micungire y’abakozi n’umutungo kandi rufite ubwisanzure mu bitekerezo no mu gufata ibyemezo mu buryo butanyuranyije n’amategeko.

Agaruka kuri Gahunda y’amahugurwa agenerwa urubyiruko rwo mu Mitwe ya Politiki (Youth Political Leadership Academy-YPLA) yavuze ko ari Gahunda ihoraho yateguwe n’Ihuriro ikaba igamije kongerera ubushobozi n’ubumenyi urubyiruko rwo mu Mitwe ya Politiki iri mu Ihuriro.
Ababwira ko iyi gahunda yemejwe n’Inama Rusange y’Ihuriro, ikaba yaragiyeho nyuma y’indi Gahunda y’amahugurwa yateguriwe abayobozi b’Imitwe ya Politiki; ari nabo basabye ko urubyiruko rwo mu Mitwe ya Politiki rwategurirwa gahunda ihoraho yo kurwongerera ubumenyi n’ubushobozi mu bya politiki. Ikaba yaratangiye mu mwaka wa 2010 mu Mujyi wa Kigali, mu mwaka wa 2011 itangira gukorwa no mu Ntara zose.

Yabwiye aba Basenari ko iyi gahunda igamije kubaka ubushobozi bw’urubyiruko rwo mu Mitwe ya Politiki no kurushishikariza kwitabira umwuga wa politiki kugira ngo ruzavemo abayobozi b’ejo hazaza bashoboye; gutegura urubyiruko kugira  ngo rwitabire kujya mu  myanya y’ubuyobozi mu Mitwe ya Politiki rubarizwamo no gufasha Imitwe ya Politiki gutera imbere; gufasha urubyiruko rwo mu Mitwe ya Politiki kugira ubumenyi n’ubushobozi burufasha kugira uruhare rugaragara mu miyoborere myiza n’iterambere ry’Igihugu.

Agaruka ku biga muri iri shuri yavuze ko ari abasore n’inkumi batoranywa n’Imitwe ya Politiki babarizwamo (iri mu Ihuriro), buri Mutwe wa Politiki wohereza umubare ungana w’abakobwa n’abahungu, ko bagomba kuba batarengeje imyaka 30 y’amavuko, bararangije cyangwa biga muri kaminuza kandi ko buri tsinda (Class/Promotion) riba rigizwe n’abantu 44 bigira i Kigali na 44 bigira mu Ntara. Iyo bageze mu Ihuriro bafatwa kimwe bose, bagasabwa kurangwa n’ubwubahane no kurangiza gahunda y’amasomo uko iteganyijwe.

Amasamo akaba atangwa n’impuguke, abashakashatsi, abarimu mu mashuri makuru na kaminuza, abanyapolitiki, cyangwa inararibonye, baturuka mu nzego za Leta, izigenga n’imiryango Nyarwanda itari iya Leta.

Yasoje avuga ko n’ubwo Ihuriro ryiyemeje, kandi biri mu nshingano zaryo, gukomeza kubaka ubushobozi bw’Imitwe ya Politiki, rifite imbogamizi y’ingengo y’imari idahagije ku buryo gutegura iyi gahunda y’amahugurwa nk’uko yari isanzwe ikorwa kabiri mu mwaka bitari gushoboka.

Ihuriro rikaba rikeneye kongererwa ingengo y’imari kugira ngo rishobore gukomeza kuzuza inshingano zaryo zo kongerera ubushobozi Imitwe ya Politiki.

Abasenateri bagize iri tsinda bashimye ibisobanuro bahawe, basaba ko Ihuriro ryazategura ikiganiro cyihariye cyo kurebera hamwe uko imikorere y’iri shuri yakomeza kunozwa kuko ari ingirakamaro, bakanarebera hamwe kandi icyakorwa kugira ngo urubyiruko rwahuguwe rurusheho kugaragaza impinduka nziza mu mikorere y’Imitwe ya Politiki.Umuvugizi w’Ihuriro yashimye abagize iyi Komisiyo, uburyo bashyira mu bikorwa inshingano zayo zo kugenzura iyubahirizwa ry’amahame remezo, n’uburyo yafashe uyu mwanya ngo igirane ibiganiro n’Imitwe ya politiki hagamijwe kugenzura uko Imitwe ya Politiki ifasha urubyiruko mu kwimenyereza umwuga wa politiki no kugira uruhare mu kwiyubaka kwayo, ariko ashima by’umwihariko uko basuye Ihuriro ngo bimenyere byimbitse imikorere y’Ishyuri ry’Ihuriro ryigisha urubyiruko ibya Politiki n’imiyoborere/YPLA  n’imbogamizi zihari kugira ngo urubyiruko rurangiza muri iryo shuri rutange umusaruro wa ngombwa mu Mitwe ya Politiki yarwo..