Kuri uyu  wa kane, tariki ya 24 Ukwakira 2019, inama isanzwe y’Inama Rusange y’Ihuriro ry’Igihugu Nyunguranabitekerezo ry’Imitwe ya Politiki yateranye, iyobowe n’Umuvugizi w’Ihuriro, Depite MUKABUNANI Christine, ishyiraho abagize Biro y’Ihuriro bashya, aho yatoye ku mwanya w’Umuvugizi, Depite MUNYANGEYO Théogène, uturuka mu Ishyaka PL, naho ku mwanya w’Umuvugizi Wungirije, itora Madamu MUSANABAGANWA Eugènie,  uturuka mu Ishyaka PSP.

Iyi nama kandi yasuzumye, inemeza raporo y’ibikorwa n’iy’imikoreshereze y’imari n’umutungo by’Ihuriro mu mwaka w’ingengo y’imari 2018-2019,  kandi ishima ibikorwa Ihuriro ryagezeho;

Iyi nama na none yasuzumye, inemeza raporo y’igenzura ku mikoreshereze y’imari n’umutungo by’Ihuriro mu mwaka w’ingengo y’imari 2018-2019; inemeza raporo y’indorerezi z’Ihuriro zakurikiranye itora ry’Abasenateri ryo muri Nzeri 2019.
 

Abagize iyi Nama bashimye ko iri tora ryakozwe mu mucyo, mu bwisanzure no mu mutekano bisesuye. Ikindi, yashimye ubufatanye bw’inzego zagize uruhare mu myiteguro no mu migendekere myiza y’ibikorwa by’itora ry’Abasenateri.