Kuri uyu wa kane, tariki ya 25 Werurwe 2021, inama isanzwe y’Inama Rusange y’Ihuriro ry’Igihugu Nyunguranabitekerezo ry’Imitwe ya Politiki yateranye, iyobowe n’Umuvugizi w’Ihuriro, Senateri UWERA Pélagie.

Abagize iyi Nama, bagejejweho ikiganiro kuri Politiki y’Igihugu y’Uburinganire ivuguruye; cyatanzwe na Minisitiri w’Uburinganire n’Iterambere ry’Umuryango; bungurana ibitekerezo ku ishyirwa mu bikorwa ry’imyanzuro ireba Ihuriro ya Raporo ya Sena kuri gahunda y’amahugurwa ya Youth Political Leadership Academy (YPLA); banashyiraho abagize inzego z’ubuyobozi bw’Ihuriro.

Minisitiri w’Uburinganire n’Iterambere ry’Umuryango Prof. BAYISENGE Jeanette watanze ikiganiro kuri Politiki y’Igihugu y’Uburinganire ivuguruye; yerekanye impamvu y’ivugururwa ry’iyi politiki n’icyo igamije. Ikindi, yerekanye ko iyi politiki ivuguruye izarushaho gushimangira uruhare n’iterambere by’umugore mu muryango nyarwanda.

Inama Rusange yashimye intera u Rwanda rugezeho mu kwimakaza ihame ry’uburinganire, isaba Imitwe ya Politiki n’Abanyarwanda muri rusange gukomeza kubumbatira umuryango kuko ariwo shingiro ry’ubuzima bw’Igihugu.Ku ngingo yo kungurana ibitekerezo ku ishyirwa mu bikorwa ry’imyanzuro ireba Ihuriro ya Raporo ya Sena kuri gahunda y’amahugurwa ya Youth Political Leadership Academy (YPLA), abagize Inama Rusange bemeje ingamba zizafasha mu ishyirwa mu bikorwa ry’imyanzuro ireba Ihuriro.

Naho ku ngingo ijyanye no gushyiraho abagize inzego z’ubuyobozi bw’Ihuriro; Inama Rusange yashyizeho abagize Komisiyo zihoraho z’Ihuriro zikurikira: Komisiyo Mbonezabupfura no gukemura amakimbirane; Komisiyo ishinzwe gahunda, ibikorwa by’Ihuriro n’ubufatanye n’izindi nzego; na Komisiyo ishinzwe itumanaho no kungurana ibitekerezo.

Iyi Nama Rusange kandi yatoye Bwana GISAGARA Théoneste (wo mu Mutwe wa Politiki PL), ku mwanya w’Umunyamabanga Nshingwabikorwa w’Ihuriro, asimbura Bwana BURASANZWE Oswald, wo mu Mutwe wa Politiki PL. Inama kandi yashyizeho abagize Biro y’Ihuriro, ari bo: Depite  UWINGABE Solange, uturuka mu Mutwe wa Politiki PSR, ku mwanya w’Umuvugizi; na Bwana NGIRUWONSANGA Jean Damascène,  uturuka mu Mutwe wa politiki UDPR, ku mwanya w’Umuvugizi Wungirije.