INSHINGANO Z'IHURIRO

« Ihuriro Nyunguranabitekerezo ry'Imitwe ya politiki mu Rwanda ni urubuga rusesuye imitwe ya politiki yunguraniramo ibitekerezo, ikaganira ku bibazo biremereye Igihugu ikanatanga inama kuri politiki na gahunda z'igihugu. Ni n'urwego ruhoraho rwongerera ubushobozi imitwe ya politiki irugize mu kunoza imiyoborere yayo no gutunganya umurimo wa politiki; rukaba n'urubuga rwo gucyemura amakimbirane no gushimangira imyitwarire ikwiye kuranga Umunyapolitiki mu Rwanda. ».

« Igitekerezo cy'uko habaho uburyo imitwe ya politiki yajya yunguraniramo ibitekerezo ku byerekeye umurava ugomba kuranga abanyapolitiki cyaganiriweho mu mishyikirano y'Amahoro y'Arusha, ikigamijwe ari uko mu igabana ry'ubutegetsi hashingirwa ku nyungu rusange z'Abanyarwanda no kubaka Igihugu kigendera ku mategeko. Ikindi cyihutirwaga muri ayo masezerano yo ku itariki ya 09 Mutarama 1993 mu igabana ry'Ubutegetsi ni uko imitwe ya politiki yagombaga gutegurira abayoboke bayo inyigisho mu bya politiki kugira ngo bashobore kurwanyiriza hamwe icyaba intandaro y'umwiryane n'iheza iryo ari ryo ryose muri politiki. ».

« Aya mahame yose yashingiweho mu ishyirwaho ry'Ihuriro nyuma y'intambara na nyuma ya Jenoside yo mu 1994 kugira ngo habeho urubuga nyunguranabitekerezo hagati y'imitwe ya politiki mu ishyirwaho no mu micungire y'Inzego z'Inzibacyuho, yashimangiwe n'igihe abaturage batoraga Itegeko Nshinga tariki ya 26 Gicurasi 2003. Iryo Tegeko Nshinga rikaba ryaremeje ko kuganira no kujya inama ari bwo buryo buboneye bwo gukora politiki no gushimangira ubwisanzure bushingiye ku bitekerezo binyuranye mu Rwanda. ».

 Inshingano z'Ihuriro zikubiye mu Itegeko Nshinga ryo ku wa 04 Kamena 2003:
Itegeko Nshinga, ingingo ya 56:
«Bitabangamiye ubwigenge bwa buri mutwe wa politiki mu mibereho no mu mikoranire yayo, imitwe ya politiki yemewe mu Rwanda yishyira hamwe mu Ihuriro Nyunguranabitekerezo ry'Imitwe ya politiki. . ».

Iryo huriro rishinzwe cyane cyane:

• Gutuma imitwe ya politiki yungurana ibitekerezo ku bibazo biremereye Igihugu;
• Gushimangira ubumwe bw'Abanyarwanda;
• Gutanga inama kuri politiki y'Igihugu;
• Kuba umuhuza mu bibazo bivutse hagati y' Imitwe ya politiki;
• Gufasha gukemura ibibazo bivutse mu Mutwe wa politiki, iyo ubisabye.

Ibyemezo by'Ihuriro bifatwa buri gihe ku bwumvikane busesuye bw'Imitwe ya politiki irigize. Twibutse ko, duhereye ku bivugwa mu ngingo ya 82 y'Itegeko Nshinga, Ihuriro rifite ububasha bwo kugena Abasenateri 4 muri 26 bagize umutwe wa Sena.