INZEGO N’IMIKORERE

Ihuriro rigizwe n’Imitwe ya Politiki icyenda:

• Umuryango FPR-Inkotanyi
• Ishyaka Riharanira Ukwishyira Ukizana kwa Buri Muntu - PL
• Union Démocratique du Peuple Rwandais - UDPR
• Ishyaka Ntangarugero muri Demokarasi - PDI
• Ishyaka Riharanira Demokarasi n’Imibereho Myiza y’Abaturage - PSD
• Ishyaka ry’Iterambere n’Ubusabane - PPC
• Ishyaka Riharanira Demokarasi Ihuza Abanyarwanda - PDC
• Ishyaka ry’Abakozi mu Rwanda - PSR
• Ishyaka ry’Ubwisungane Bugamije Iterambere - PSP

Ihuriro ni urwego rwemejwe n’Itegeko Nshinga ry’u Rwanda, rikaba rigengwa n’Itegeko Ngenga n° 16/2003 ryo ku wa 27 Kamena 2003 rigenga imitwe ya politiki n’abanyapolitiki.

Itegeko Ngenga N° 16/2003, Ingingo ya 50:

Ihuriro Nyunguranabitekerezo ry’Imitwe ya politiki rivugwa mu ngingo ya 56 y’ Itegeko Nshinga ni urwego rwigenga mu micungire y’abakozi n’umutugo kandi rufite ubwisanzure mu bitekerezo no mugufata ibyemezo mu buryo butanyuranyije n’itegeko. Icyicaro cy’Ihuriro cyiri mu murwa mukuru w’u Rwanda.

Ihuriro rigendera ku Mategeko Ngengamikorere yaryo yemejwe ku itariki ya 30 Ukwakira 2003 rikaba rifite n’Indangamyitwarire y’Imitwe ya Politiki n’Abayoboke bayo. Izi nyandiko zombi zigendera ku mahame shingiro yo kubaha ubwigenge bwa buri mutwe wa politiki ugize Ihuriro, ubwisanzure mu bitekerezo no mu murimo wa politiki kimwe no guteza imbere demokarasi ishingiye ku bwumvikane busesuye.

Amategeko Ngengamikorere, ingingo ya 17:

Ibyemezo by’ Inama Rusange y’ Ihuriro bifatwa ku bwumvikane busesuye bw’Imitwe ya politiki yaje mu nama. Iyo butabonetse, inama yongera gutumizwa ku nshuro ya kabiri ku ngingo zitumvikanyweho, na none ubwunvikane butaboneka, impaka kuri izo ngingo zisubikwa nibura igihe cy’ inama ebyiri zitarongera kujyibwaho impaka. Kwinjira mu Ihuriro nti biri mu bisabwa kugira ngo umutwe wa politiki wandikwe cyangwa wemerwe. Ikindi ni uko no kuba mu Ihuriro bitabangamira ubwigenge bw’imitwe ya politiki cyangwa imikoranire hagati yayo.

Ihuriro rituma n’imitwe ya politiki itarabashije kugira 5% by’amajwi y’abatoye igira aho itangira ibitekerezo bya politiki, bityo nayo ikagira uruhare mu miyoborere y’Igihugu. Ni ihame rigamije gushimangira ubwumvikane busesuye kandi buha buri wese amahirwe angana nta guheza; buri mutwe wa politiki ukaba ufite ijwi ringana n’iry’undi.

Mu rwego rwo kubahiriza uburenganzira rihabwa n’Itegeko Nshinga, Ihuriro rifite Inzego eshatu: Inama Rusange, Biro y’Ubuvugizi, n’Ubunyamabanga Nshingwabikorwa.

Inama Rusange

Inama Rusange ni rwo rwego rukuru rw’ Ihuriro. rugizwe n’ Imitwe ya politiki yemewe mu Rwanda. Buri mutwe wa politiki ukaba uhagararirwa n’abantu bane (4), babiri muri bo bakaba bagomba kuba ari igitsina gore.

Biro y’Ihuriro

Biro y’Ihuriro igizwe n’Umuvugizi n’Umuvugizi Wungirije. Inshingano ya Biro ni iyo gukurikiranira hafi ishyirwa mu bikorwa ry’ibyemezo by’Inama Rusange no guhagararira Ihuriro imbere y’amategeko.

Ubunyamabanga Nshingwabikorwa

Ubunyamabanga Nshingwabikorwa buyoborwa n’Umunyamabanga Nshingwabikorwa bukaba bugizwe n’amashami anyuranye y’inzego z’imirimo.

Umuvugizi, Umuvugizi wungirije n’ Umunyamabanga Nshingwabikorwa batorwa n’ Inama Rusange buri wese ku giti cye, mu bakandida batangwa n’ Imitwe ya politiki igize Ihuriro. Umuvugizi n’Umuvugizi Wungirije batorerwa manda y’imyaka itatu (3) naho Umunyamabanga Nshingwabikorwa agatorerwa manda y’imyaka itanu (5). Manda yabo bose ishobora kongerwa inshuro imwe gusa.